அரியலூர் மாவட்டம், ஜெயங்கொண்டம் பஸ் நிலையத்திற்கு தினமும் ஏராளமான பயணிகள் வந்து செல்கின்றனர். இந்த நிலையில் ஜெயங்கொண்டம் சுற்று வட்டார பகுதியைச் சேர்ந்த பொதுமக்கள் வெளியூர் செல்ல வேண்டும் என்றால் தங்களது வீடுகளில் இருந்து இருசக்கர வாகனங்களில் ஜெயங்கொண்டம் பஸ் நிலையம் வந்து தங்களின் இருசக்கர வாகனங்களை பாதுகாப்பற்ற நிலையில் நிறுத்திவிட்டு வெளியூர் சென்று வருகின்றனர். இதனால் அவர்களின் வாகனங்கள் வெயிலிலும், மழையிலும் நின்று வீணாகும் நிலை உண்டாவதுடன், திருட்டு நடைபெறவும் அதிக வாய்ப்பு உள்ளது. எனவே இதுகுறித்து சம்பந்தப்பட்ட அதிகாரிகள் விரைந்து நடவடிக்கை எடுத்து ஜெயங்கொண்டம் பஸ் நிலையத்தில் இருசக்கர வாகனங்கள் நிறுத்துமிடம் ஏற்படுத்த வேண்டும் என கேட்டுக்கொள்கிறோம்.