புதுக்கோட்டை மாவட்டம் ஆதனக்கோட்டை அருகே உள்ள வளவம்பட்டி கிராமத்தில் வளவம்பட்டியில் இருந்து சோத்துப்பாளை செல்லும் சாலையில் அம்மையன் தெரு பிரிவு சாலையோரத்தில் விவசாய மின் இணைப்பிற்கு செல்லும் மின்கம்பம் அமைக்கப்பட்டுள்ளது. இந்த மின் கம்பம் அமைக்கப்பட்ட பல ஆண்டுகள் ஆனதால் தற்போது சிதிலமடைந்து எலும்புக்கூடுபோல் காட்சி அளிக்கிறது. இந்தநிலையில் இந்த மின்கம்பத்தை அகற்றிவிட்டு புதிய மின் கம்பம் அமைக்கும் நோக்கில் அதன் அருகில் புதிய மின் கம்பம் அமைக்கப்பட்டு உள்ளது. ஆனால் கடந்த ஆறு மாதங்கள் ஆகியும் பழைய மின்கம்பத்தில் இருந்து புதிய மின் கம்பத்திற்கு மின் இணைப்புகள் மாற்றப்படவில்லை. இதனால் பொதுமக்கள் நடமாட்டத்தின்போது இந்த மின் கம்பம் முறிந்து விழுந்தால் விபத்து ஏற்படும் அபாயம் உள்ளது. எனவே இது குறித்து சம்பந்தப்பட்ட அதிகாரிகள் விரைந்து நடவடிக்கை எடுக்க வேண்டும் என கேட்டுக்கொள்கிறோம்.