புதுக்கோட்டை மாவட்டம் இலுப்பூர் தாலுகா மலைக்குடிபட்டியில் அரசு ஆரம்ப சுகாதார நிலையம் அமைக்கப்பட்டுள்ளது. இந்த ஆரம்ப சுகாதார நிலையத்திற்கு தினமும் சுற்று வட்டார பகுதியைச் சேர்ந்த ஏராளமான பொதுமக்கள் வந்து சிகிச்சை பெற்று செல்கின்றனர். இந்நிலையில் இந்த வழியாக செல்லும் வாகன ஓட்டிகள் அதிக வேகமாக செல்வதினால் இப்பகுதியில் அடிக்கடி விபத்து ஏற்பட்டு வருவதாகவும், அதனை தடுக்க இப்பகுதியில் சாலையின் குறுக்கே வேகத்தடை அமைக்கவும் இப்பகுதி மக்கள் கோரிக்கை விடுத்தனர். இதுகுறித்து தினத்தந்தி புகார் பெட்டியில் செய்தி வெளியிடப்பட்டது. இதனை அறிந்த சம்பந்தப்பட்ட அதிகாரிகள் நடவடிக்கை எடுத்து இப்பகுதியில் வேகத்தடை அமைத்தனர். எனவே செய்தி வெளியிட்ட ‘தினத்தந்தி’ புகார் பெட்டிக்கும், நடவடிக்கை எடுத்த அதிகாரிகளுக்கும் இப்பகுதி மக்கள் நன்றி தெரிவித்தனர்.