ஆக்கிரமிப்புகளால் பயணிகள் அவதி

திருச்சி ஜங்சன் ரெயில் நிலையம் முன் மன்னார்புரம் செல்லும் சாலையிலும், தலைமை தபால் நிலையத்தில் இருந்து ஜங்சன் ரவுண்டானா வரும் சாலையிலும் சாலையை ஆக்கிரமித்து பிரியாணி கடைகள், தள்ளுவண்டி கடைகள், டீக்கடைகள் வைக்கப்பட்டுள்ளன. இதனால் அந்த கடைகளுக்கு வரும் வாகன ஓட்டிகள் சாலையிலேயே வாகனங்களை நிறுத்திவிட்டு கடைகளுக்கு செல்கிறார்கள். இதனால் பகல் மற்றும் இரவு நேரங்களில் அந்த பகுதியில் போக்குவரத்து நெரிசல் ஏற்படுகிறது. அத்துடன் மன்னார்புரம் வழியாக செல்லும் பஸ்கள் நிற்கும் பகுதியிலும் பஸ்நிறுத்தத்திலும், பஸ்நிறுத்தம் அருகிலும் ஆக்கிரமிப்புகள் உள்ளன. இதனால் பஸ்கள் சாலையின் நடுவில் நிறுத்தி பயணிகளை ஏற்றி இறக்கும் நிலை உள்ளது. எனவே இந்த சாலைகளில் உள்ள ஆக்கிரமிப்புகளை அகற்ற சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம்.