பராமரிக்கப்படாத பூங்கா

திருச்சி தில்லை நகர் அறிவியல் பூங்காவிற்கு மாலை நேரத்தில் ஆயிரக்கணக்கான மக்கள் வந்து செல்கின்றனர். இங்கு வரும் சிறுவர்கள் விளையாடி மகிழ்வதற்காக விளையாட்டு உபகரணங்கள் அமைக்கப்பட்டுள்ளன. இந்த விளையாட்டு உபகரணங்கள் சரியான பராமரிப்பு இன்றி சத்தம் கேட்கிறது. மேலும் போதுமான விளையாட்டு உபகரணங்கள் அமைக்கப்படாமல் உள்ளதால் பெரும்பாலான குழந்தைகள் ஏமாற்றம் அடைகின்றனர். சில ஆண் சிறுவர்கள் இங்கு அமைக்கப்பட்டுள்ள ஊஞ்சல்களில் உட்கார்ந்துகொண்டு அவற்றிலிருந்து இறங்க மறுக்கின்றனர். அவர்களிடம் இறங்குமாறு தெரிவிக்கும் பெற்றோர்களிடமும் அவர்கள் வாக்குவாதத்தில் ஈடுபடுகின்றனர். இதனால் தங்கள் குழந்தைகளை விளையாடுவதற்காக அழைத்து வரும் பெற்றோர்கள் பெரிதும் ஏமாற்றம் அடைகின்றனர். மேலும் இந்த பூங்காவில் அமைக்கப்பட்டுள்ள நடைபயிற்சி பாதையின் ஓரத்தில் அமைக்கப்பட்டுள்ள ஒரு மின் கம்பத்தை அருகில் உள்ள மரக்கிளைகள் மறைத்துள்ளதால் இரவில் போதிய வெளிச்சம் இல்லை. சில இடங்களில் போதுமான மின் விளக்குகள் அமைக்கப்படாமல் உள்ளதால் இருள் சூழ்ந்து காணப்படுகிறது. குழந்தைகள் விளையாடும் உபகரணங்களின் அருகே போதிய இருக்கைகள் அமைக்கப்படாமல் உள்ளதால் பெற்றோர்கள் தங்களின் குழந்தைகள் விளையாடும் வரை கால் கடுக்க நிற்க வேண்டிய நிலை உள்ளது. மேலும் இங்கு அமைக்கப்பட்டுள்ள நீரூற்றும் பராமரிப்பு இன்றி உள்ளது. எனவே இதுகுறித்து சம்பந்தப்பட்ட அதிகாரிகள் விரைந்து நடவடிக்கை எடுத்து பொதுமக்களின் தேவையை பூர்த்தி செய்வதுடன் பூங்காவில் அமைக்கப்பட்டுள்ள விளையாட்டு உபகரணங்களை முறையாக பராமரிக்க வேண்டும் என கேட்டுக்கொள்கிறோம்.