கிடப்பில் போடப்பட்ட பணி

அரியலூர் மாவட்டம், ரெட்டிபாளையம் பஞ்சாயத்திற்கு உட்பட்டது மு.புத்தூர் கிராமம். இந்த கிராமத்தில் வி. கைகாட்டி செல்லும் சாலையின் மேற்கு புறத்தில் மங்கட்டான் ஏரி ஒன்று உள்ளது. இந்த ஏரியில் அருகிலுள்ள கிராமங்களின் ஆடு, மாடுகள் மேய்ந்த பிறகு மதிய நேரத்தில் தண்ணீர் குடித்து இளைப்பாறும் . இந்த ஏரியின் கரைகளுக்கு போதிய அளவு தடுப்பு சுவர் பாதுகாப்பு இல்லை. மேலும் மு. புத்தூரில் இயங்கும் தனியார் சுண்ணாம்புக்கல் சுரங்கத்திலிருந்து அரியலூருக்கு 24 மணி நேரமும் டிப்பர் லாரிகள் மூலம் சுண்ணாம்பு கல் லாரிகள் மின்னல் வேகத்தில் எடுத்து சென்று வருகிறது. இப்பகுதியின் சாலை மிகவும் குறுகிய சாலை என்பதால் அடிக்கடி விபத்து நிகழும் பகுதியாக இருந்து வருகிறது . எனவே இந்த ஏரிக்கரை முழுவதும் தெற்கிலிருந்து வடக்கு நோக்கி தடுப்பு சுவர் அமைக்க வேண்டும் என்று இப்பகுதி மக்கள் சில மாதங்களுக்கு முன்பு கோரிக்கை விடுத்திருந்தனர். அதன்படி சில மாதங்களுக்கு முன்பு தென்புற பகுதியில் இருந்து ஏரியின் நடுப்பகுதி வரை பாதியளவு மட்டும் தடுப்புச்சுவர் அமைக்கப்பட்டுள்ளது. பிறகு ஏரியின் நடு பகுதியில் இருந்து வடக்கு பகுதி முடிவு வரை இதுநாள் வரை தடுப்புச்சுவர்கள் அமைக்காமல் பணி கிடப்பில் போடப்பட்டுள்ளதால் மின்னல் வேகத்தில் செல்லும் சுண்ணாம்புக்கல் லாரிகள் ஏரியினுள் விபத்துகள் ஏற்பட்டு லாரிகள் தலை கீழாக கவிழும் அபாய நிலை உள்ளது . இந்த ஏரி அருகே அடிக்கடி விபத்து நிகழும் மோசமான பகுதியாகும். எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம்.