ரோட்டில் ஆபத்தான பள்ளம்

நெல்லை சந்திப்பு மதுரை ரோட்டில் தினமும் ஆயிரக்கணக்கான வாகனங்கள் மற்றும் பொதுமக்கள் சென்று வருகிறார்கள். இதில் பஸ்நிலையத்தையொட்டி உள்ள ரோட்டில் மெகா பள்ளம் உருவாகி உள்ளது. வாகனங்களில் செல்வோர் பள்ளம் இருப்பதை தெரியாமல், அருகில் சென்றதும் திடீர் பிரேக் போடுவதால் அவ்வப்போது விபத்துகளும் ஏற்படுகின்றன. இந்த பள்ளத்தை நிரப்ப சிறிதளவு மண் போட்டனர். ஆனால் சிறிதுநேரத்தில் மண் போட்ட இடம் தெரியாத அளவுக்கு காணாமல் போய் விட்டது. எனவே மாநகரின் மைய பகுதியான சந்திப்பு-மதுரை ரோட்டில் உள்ள ஆபத்தான பள்ளத்தை மூட வேண்டும். இதேபோல் அம்பேத்கர் சிலை முன்பும், பஸ் நிலையத்தின் வடக்கு பகுதி போலீஸ் குடை அருகில் உள்ள பள்ளங்களையும் சீரமைக்க வேண்டும்.